O‘zbekiston Respublikasi Prezidentining 2024-yil 16-oktabrdagi PF–158-sonli "Kasbiy ta’limda malakali kadrlar tayyorlash tizimini yanada takomillashtirish va xalqaro ta’lim dasturlarini joriy qilish chora-tadbirlari to‘g‘risida"gi Farmoni hamda Oliy ta’lim, fan va innovatsiyalar vazirligining 2025-yil 16-maydagi “Texnikumlarning Karyera markazlari faoliyatini yo‘lga qo‘yish to‘g‘risida”gi buyrug‘i asosida 2025-yil 26-maydan boshlab Samarqand tuman politexnikumida Karyera markazi o‘z faoliyatini boshladi.
Mazkur markaz yuridik shaxs maqomiga ega bo‘lmagan, ammo keng ko‘lamli faoliyat yuritishga mo‘ljallangan tarkibiy tuzilma bo‘lib, uning asosiy maqsadi politexnikum bitiruvchilarining mehnat bozorida munosib o‘rin egallashlarini ta’minlash, ularni kasbiy rivojlanish yo‘nalishlarida qo‘llab-quvvatlashdan iboratdir.
Karyera markazi faoliyatining asosiy yo‘nalishlari:
???? Politexnikumda karyera kunlarini muntazam o‘tkazish, o‘quvchilarni ish beruvchilar bilan bevosita tanishtirish, shuningdek, muvaffaqiyatli faoliyat yuritayotgan davlat va xususiy sektor vakillari bilan mahorat darslari tashkil etish;
???? Korxona va tashkilotlar bilan hamkorlik shartnomalarini tuzish, mavjud bo‘sh ish o‘rinlari to‘g‘risida o‘quvchilarga ma’lumot berish va ularni ishga joylashtirishga ko‘maklashish;
???? Politexnikumda tayyorlanayotgan kasb va mutaxassisliklarga mos korxona va tashkilotlar bilan amaliyot tizimini yo‘lga qo‘yish, o‘quvchilarni real ishlab chiqarish muhiti bilan tanishtirish;
???? Dual ta’lim shaklida o‘qitish uchun seminar-treninglar tashkil etish, bu borada ishlab chiqarish korxonalari bilan hamkorlikni mustahkamlash;
???? O‘quvchilarning o‘qishdan bo‘sh vaqtlarida ishlash istaklarini inobatga olgan holda kasbiy yo‘naltirish va maslahat berish xizmatlarini ko‘rsatish;
???? Bitiruvchilarni bandligini ta’minlash maqsadida mehnat bozoridagi ehtiyojlar haqida muntazam axborot berish, ularni ichki va tashqi mehnat bozori bilan bog‘lovchi vositachilik faoliyatini yo‘lga qo‘yish.
Karyera markazi – talab va ehtiyojlar orasidagi ko‘prik
Bugungi kunda Karyera markazi samarali faoliyat olib bormoqda. Politexnikum rahbariyati tomonidan mazkur markaz uchun alohida xona ajratilgan, zarur jihozlar bilan ta’minlangan, mutaxassislar faoliyat yuritmoqda. Ish beruvchilar bilan tuzilgan hamkorlik memorandumi asosida bir qator o‘quvchilar ishlab chiqarish amaliyotiga yuborildi, ayrim bitiruvchilar esa ishga joylashtirildi.
Markaz tomonidan politexnikum o‘quvchilari uchun kasbiy yo‘nalish bo‘yicha testlar, seminar-treninglar, individual maslahatlar kabi faoliyatlar ham olib borilmoqda. Bu esa o‘quvchilarning o‘z qiziqishlari va salohiyatlariga mos kasb tanlashlariga, o‘z ustida ishlashlariga turtki bo‘layotir.
Xulosa qilib aytganda, Samarqand tuman politexnikumidagi Karyera markazi faoliyati zamonaviy kasbiy ta’lim talablariga mos bo‘lib, yoshlarning bandligini ta’minlash, ularning zamonaviy mehnat bozoriga integratsiyalashuvi uchun muhim platforma bo‘lib xizmat qilmoqda.
